《龍虎門》係一眾香港中產男性心目中經典漫畫之一。三個主角喺埋一齊特別有賣點。用喺分析當前經濟一樣掂。之前龍虎雙王──AMS 3.8與直通車出場後不出兩星期，「石黑龍」終於等到位出場──話說G20未召開前，奧巴馬例牌都就人民幣匯率講番兩句而向阿爺施壓，人行唔聲唔聲嚇你一驚話要進一步改革人仔匯率機制，喺全球經濟逐漸復甦，中國經濟亦漸趨穩固下出力。
人行表明人仔匯率將回歸金融海嘯前有管理的浮動匯率，呢個亦都係中國宏觀經濟政策正常化的組件部分。
人仔慢慢爬，有助阿爺控制通脹及重整經濟增長模式；呢次係○五年匯改基礎上大踏步，阿爺將繼續對人民幣匯率浮動進行主動式管理，增強彈性。保持人仔喺「合理、平衡」基調下促進國際收支平衡，維護宏觀經濟同穩定金融市場。
從技術分析來推論，A股已經去到「熊三尾，牛一現」。香港市，同瑋哥喺一個座談會傾過，技術位唔破，暫時似牛二多過熊三。AMS 3.8、直通車加上改革人仔匯率機制各有主線，但同時又三環緊扣。直情係好似表哥存書中其中一期書名「龍虎三王再顯神通」，似乎領大家更加要勤力追落去。
香港大學電子金融服務榮譽助理教授 徐燦傑