微軟創辦人蓋茨（Bill Gates）呢位軟件業巨富喺兩年前宣布退休，退出參與微軟嘅業務運作，當時好多人都懷疑佢係咪好似自己所講咁樣，專心發展佢同老婆創辦嘅慈善事業。事隔兩年，蓋茨唔單止成功以行動證明「退休」嘅決心，而且更成功證明佢即使離開軟件行業，仍有着改變世界嘅能力。
蓋茨早前同老友巴菲特呼籲世界各地嘅超級富豪，至少捐出一半財富用於慈善事業，但從蓋茨嚟講，佢對慈善事業參與又點只出錢咁簡單？事實上，從資助愛滋病研究、低碳新能源開發、教育、農業科技以至風險投資及新金融事務，處處都展現咗蓋茨嘅身影。而與過往重視公司產品發展與業績回報嘅事業野心相比，蓋茨今日喺慈善事業嘅推廣亦變得更為務實，相對作為微軟掌舵人嘅日子，已經對外宣布「退休」嘅蓋茨，今時今日嘅生活反而更忙，而佢對國際社會嘅影響力更加係有增無減！
余絲韻