絲絲早前行開書局，見到Stephen King推出咗本新書名為《Losing Control》，封面係紐約市上空雷電交加嘅景象，仲以為係驚慄小說家史提芬‧京嘅新作，細看之下，先發現原來係英文名一樣，但中間多個D字嘅滙豐集團首席經濟師兼環球經濟及資產分配研究主管簡世勳首度執筆嘅大作，做咗25年經濟學家嘅佢，好自然係寫番老本行嘅經濟。
簡世勳新書從多角度探討新興市場崛起，點樣令西方國家漸失「話事權」，包括剖析國家資本主義抬頭及由新興市場流出嘅大量資金，如何加劇西方國家收入不均現象以及影響西方國家經濟穩定性等。佢揀呢個題材係因為有感坊間有關全球化嘅書籍主要論述西方國家如何影響新興國家，鮮有從相反方向出發。
佢仲同絲絲講，話產生執筆寫書念頭係因為去年中放咗3個月悠長假期，可以畀佢專心從事寫作。咁幾時會推出第二本書？佢就有啲無奈咁話，近日四出宣傳新作加上工作繁重，所以未決定會唔會寫第二本書，佢亦唔肯透露對邊啲經濟議題感興趣，笑言驚講出嚟會被人哋「偷橋」喎！
余絲韻