絲絲講場：金至尊又有搞作金紫荊豎世博
香港資源（02882）旗下金至尊以前做過好多有特色嘅展品，金廁所就係其中一件代表作，為咗上海世博，佢哋又整咗個「金紫荊花」嘅仿製雕塑，重約408公斤，將擺放喺世博香港館，剛周日喺上海就搞咗個交接儀式，將雕塑移至香港館。金至尊副董事徐傳順話，佢喺世博行咗兩日，去咗十幾個館，不過佢個乖女徐子淇就冇同行。
仿製雕塑放香港館
呢個仿製雕塑名為「永遠盛開的紫荊花」，以銅鑄包金製成，將擺放喺世博香港館約半個月，金至尊同時已成為世博香港館嘅黃金贊助商。今次嘅交接儀式中，公司主席黃英豪話近日好忙，雖然周日到咗上海，但即日要飛去北京，未有時間參觀世博。同場出席儀式嘅仲有金至尊執行董事許浩明。
徐傳順就參觀咗世博，佢話兩日內行咗十幾個展館，佢自己最喜歡摩洛哥館，因為呢個館展示到摩洛哥歷史及文化，感受特別深刻。不過佢就冇同個女徐子淇一齊參觀，因為七、八月上海天氣較熱，所以佢個女應該喺九月先會去參觀世博。
余絲韻