恭喜恭喜！金利豐證券研究部董事黃德几（Dickie）結婚半年後報喜！絲絲與Dickie傾開，佢話自己今年十二月做老竇，依家屋企唔夠住，但搬屋又頭痕，擔心老婆Eva會動胎氣。Dickie個女都未出世，但佢已經好緊張，話依家已為新生命做足準備喎。
Dickie話老婆嘅預產期喺十二月一日，佢又話呢次屬意料之外，但當知道做爸爸嗰一剎那，特別係知道老婆第一胎係女，佢好開心，仲話打算唔只生一個㗎。
Dickie算得上係廿四孝老公，每日會揸車送老婆返工，周末佢通常親自下廚煮兩味。相信佢遲啲都會係廿四孝嗲哋，因為佢一早搵定醫院及醫生接生，囡囡未出世就搵緊「Playgroup（遊戲小組）」嘅資料、買屋就諗定校網等。
Dickie話囡囡個名就未諗好，佢講笑話自己鍾意寶馬，個女可以叫黃寶，第時個仔就叫黃寶馬。
絲絲建議，佢哋咁鍾意迪士尼，結婚又喺迪士尼酒店擺酒，不如一對仔女嘅英文名改做Mickey & Minnie啦。
余絲韻