市場熱線：晨鳴紙業靠得住

昨日亞太區魚缸全面向上，北大人在上周末忽然宣布加強人仔匯率彈性，人仔升值預期再度升溫，亞太區魚缸創7個月以來最大升幅，區內主要魚缸普遍升逾2%。

本地魚缸裂口高開，恒指高開284點，主要係早段祖國魚缸仍有些少腳軟。但隨着區內所有魚缸升幅擴大，下半場本地魚缸再發力，恒指終重上250日線，勁升625點或3%，收報20,912點；國企指數升511點，升幅達4.4%，跑贏大市。

魚缸氣氛明顯逆轉

本地魚缸連升9個交易日，令缸邊友的起心肝入市，現貨場成交額達901.9億元，重現熱鬧氣氛。古勝上周已表示，在農行登陸祖國及本地魚缸前，本地魚缸易升難跌，如今加埋人仔升值憧憬，睇怕淡友全軍覆沒。

藍色大隻佬除利豐（00494）跟港燈（00006）下跌外，其餘全部報捷，升幅超過4%的大隻佬更有18個，反映資金流入搶貨，唔再等運到。二奶電話（00762）升9%，係冧巴溫升幅大隻佬。在下已預期受惠於人仔升值憧憬，紅色金融股做好，紅色地主亦不乏捧場客，昨日品題的中國海外（00688），升幅超過5%。

祖國移動（00941）坐擁巨額人仔茄薯，可惜午後升幅收窄至1.5%，較另一巨無霸大笨象（00005）升2%仲要落後。祖移表現落後，跟其上客表現疲弱有關，集團五月份新增用戶476.9萬，較四月份532.6萬顯著減少，同時係今年首個月上客不足500萬的月份。相反二奶電話在3G搶客愈見得心應手，芬佬捧二奶電話，捨棄祖國移動或成趨勢。

人仔升值預期升溫，資金流入香江買資產，磚頭價格有升冇跌，地主指數升4.2%，跑贏恒指3%升幅。古勝昨日講過，人仔升值，紅色地主亦係翻身時。不過，北大人對於祖國房價高居不下仍關注，人仔升值或對紅色地主短期有刺激及支持，負債過重的紅色地主，古勝勸看官最好趁呢次反彈跳車。

產能不遜行業龍頭

人仔升值，令個別行業的原材料進口成本下降，造紙業係其中一個受惠行業。昨日紙業股顯著做好，以現價比較，以登陸本地魚缸時間最短的晨鳴紙業（01812）最抵買。表面睇，晨鳴目前市值不足25億元，計及A股市值亦不過150億元左右，遠較龍頭玖龍紙業（02689）逾500億元市值，及理文造紙（02314）約300億元市值低。但以產能及營業額計算，截至○九年十二月底止，晨鳴營業額達148.15億元，較玖紙多13%，更遠超去年業績大落後的理文造紙七成有多，係紙業股真正龍頭。

單係買股要買龍頭股，晨鳴已屬紙業股首選。再睇番晨鳴一○年第一季成績表，營業額39.17億元，較去年同季大增36%，盈利2.38億元，較○九年同季的785萬元暴增29.3倍；增幅誇張，但體現了公司年報所指，「造紙行業處於上升期」的預期。晨鳴首季成績表咁靚仔，全年成績表值得憧憬，「小魔怪」份吹水報告大膽將其一年目標價上調至12元，唔係靠估也。

戰報

光大國際（00257） +12%

古勝上周二推介的光大國際穩步上揚，昨日高見3.57元，較推介當日低位3.16元累升12.9%。

環能國際（08182） +11%

帥哥本月十五日推介的環能，當日低位0.52元，之後股價拾級而上，昨日高見0.58元，累升11.5%。

古勝