金融海嘯後，銀行家日日畀人鬧薪高兼攞大額花紅，但佢哋一於少理，近排經濟好番啲，生意好咗，佢哋嘅議價能力節節回升。彭博社引述滙控（00005）出差經費主管Lee Whiteing話，去年冇借勢減低出差開支，依家已經冇機會咁做。
Lee Whiteing掌管滙控5,000名員工嘅出差費，呢啲影響銀行家生活質素，但又冇計落薪酬福利條數，都幾襟計，佢話去年其實好有機會改變出差政策，因當時員工有份工喺手已好開心，不過既然做唔到，佢亦坦白承認反應係遲咗。
依家僱員嘅議價能力愈嚟愈強，特別係投資銀行方面，Lee Whiteing話你叫佢哋搭經濟客位，佢轉個頭就過檔。其實投資銀行方面比較要求高不難明白，因為呢兩年搵錢搵得最多，如果下次再見到盈利冇增長，咪先至再改政策囉。
余絲韻