正當大家以為翁富澤（Richard）離任滙豐中國行長兼行政總裁一職，好快會轉到滙控（00005）其他部門之際，佢原來會跳槽去富國銀行。今個月先見到佢喺滙豐中國總部大樓開幕時出現，突然另謀高就，認真嚇咗絲絲一跳！
正所謂天下無不散之筵席，Richard喺滙豐足足20年，輾轉負責過唔同嘅部門，○四年到滙豐中國，就見證開設第一家村鎮銀行支行，亦曾為集團成為首家喺A股上市嘅外資銀行而努力拚搏。
滙豐已發咗內部通知，話Richard本月底就正式同大家講拜拜，而另一邊廂，富國亦公布Richard喺十月加盟，負責環球金融機構及貿易服務、國際金融服務等。啱啱好3個月過冷河。
Richard喺滙豐中國鎮守咗6年，未來佢將會駐守三藩市，唔知佢第時會唔會好懷念中國菜呢？
余絲韻