絲絲講場：李寧：「升呢」先算成功
體操王子、李寧（02331）創辦人兼主席李寧，尋日到科技大學與學生分享做生意經驗，絲絲係李寧嘅「粉絲」，梗係有去捧場，有人問李寧做生意嘅成功秘訣，佢就好謙虛咁話依家未算真正成功，仍在努力當中，真正嘅成功係將李寧品牌「升呢」，成為國際品牌。
回想當年創業險執笠
佢仲話做人一定要有夢想，回想當年做運動員亦都係一樣，依家做生意除咗夢想之外，最重要係堅持，唔係就好難成事。
李寧回想當年創業，與台灣及新加坡合資經營體育用品，一次入咗200萬美元嘅貨，但就要花幾年才全部清倉，搞到公司差啲執笠，好在當年內地嘅體育用品市場競爭冇依家咁激烈，公司繼續堅持經營下去，終於走出一片新天地。
佢話公司一直都好着重團隊精神，不過佢自己好早就冇參與公司營運，放手畀下屬發展，佢相信有能者居之。
點樣至可以將產品國際化？佢就話中國缺乏運動用品經營嘅人才，而外國嘅運動用品營銷手法了得，如果中國品牌要成為國際品牌，相信喺營銷理念上一定要有突破。
余絲韻