市場熱線：霸王基金翻兜

受惠於花旗魚缸走高，昨日東瀛魚缸亦一洗頹風，日經平均指數自上月下旬以來首次重上一萬點關，收報10,067點，升179點，若近月營造嘅雙底成立，短線反彈可持續。至於祖國魚缸，本周初一連三天假期完結，今日復市，料可隨外圍開高，且看滬綜指能否於月底基金半年結前突破阻力位2,650點水平。

恒指「七翻身」在望

本地魚缸周二收報20,062點，升10點，但即月及下月期指明顯高水，睇嚟經歷「五窮」、「六絕」之後，「七翻身」在望。事實上，有番咁上下「股齡」嘅投資者，都知道順國策而為嘅重要。最後一家祖國錢莊——農業銀行即將啟動招股活動，呢個大製作關係到農村金融改革，唔容許有閃失，相信一眾紅色力量已調動資金，全力配合招股活動，而本地富豪亦自然樂意出一分力為祖國効勞，喺國策護航之下，農行下月可望順利喺A股及港股登場，於此前後兩地股市會持續偏穩。

近期魚缸氣氛有改善，但交投仍然淡靜，除咗因為假期因素之外，相信亦跟大量資金準備認購農行有關。不過，若然短期外圍市況持續好轉，農行認購反應佳，並帶動影子股上升，相信大市交投亦會有所改善。唔講唔覺，炒家們猶如春江鴨，水暖先知，最近二、三線股成交轉趨活躍，係市況改善嘅另一個訊號。周二古勝介紹嘅中國光大國際（00257）走勢對辦，收報3.31元，升3.4%，可以穩坐釣魚船。

正正由於本月底基金半年結在即，建議實基金股表現，其中霸王集團（01338）股價自今年以來經歷兩次大浪，但每次浪底都比前次高，反映低位承接力十足，周二收市報5.93元，較上月底低位極速反彈26%，沽壓唔多。

眾所周知，霸王嘅洗髮露產品行銷內地市場，為咗充分發揮銷售網絡嘅效益，公司除咗積極拓展其他個人護理產品業務之外，更落實將戰線伸延至涼茶產品，首站先推粵省市場，繼而由華南地區擴展至華北地區。

不斷加強產品組合

產品組合得到提升，加上喺強勁嘅推廣攻勢之下，協同效益可予憧憬，難怪獲多個基金捧場。

目前持有霸王逾5%股權嘅基金有Mirae Asset、FMR及The Capital Group。The Capital Group於上月底曾減持霸王股份，但本月初即入場反手增持，唔排除係見股價質唔落，所以急急腳補貨。睇嚟半年結前後炒高機會較高，目標再試6.5-6.6元阻力區，止蝕位5.6元。

戰報

東風集團（00489） +9%

股博士本月九日推介東風，受惠於以舊換新期限延長，周二高見8.78元，較推介當日低位升9.6%。

國中控股（00202）+17%

小尾本月二日推介的國中，當日低位0.78元，股價經過周一急升後，周二高見0.92元，累升17.9%。

古勝