滙控（00005）北美洲業務係金融海嘯期間嘅重災區，過去幾年帶領滙豐北美消費融資業務及次按問題走出困境而備受讚賞嘅麥端納（Brendan McDonagh）竟然宣布退休，據聞與上位路途受阻有關。
滙控日前宣布北美業務易帥，旗下滙豐北美副行政總裁Niall Booker將由八月一日起，接替麥端納出任滙豐北美行政總裁。據知麥端納喺滙控任職逾30年，現年51歲仍未屆退休之齡，佢提早引退難免惹人猜測。英國《金融時報》尋日就引述知情人士話，麥端納萌生去意主要由於有感將來可以晉升做集團CEO嘅機會渺茫。
報道仲話，麥端納認為現任滙控集團行政總裁紀勤將繼續在位數年，集團內部確有唔少強勁對手爭坐CEO寶座，當中以滙控歐洲、中東及環球業務主席歐智華為首，令未來上位之路受阻。
余絲韻