絲絲講場:牛根生專注公益慈善

一直以來,絲絲都好欣賞微軟創辦人蓋茨對社會公益嗰份熱心,但原來內地亦有出色企業家都有同樣嘅善心,佢就係蒙牛乳業(02319)創始人兼董事會主席牛根生。

公司實務唔再參與

之前牛總辭咗集團執行職務,只做非執行董事,尋日公司開股東會,牛總當然到嚟與捧佢場嘅小股東見面,會上佢提到以後會用更多時間做公益慈善事業,公司嘅具體事務就唔會再參與,但都會參與整體嘅大策略發展。絲絲對牛總呢份熱心相當敬重,喺呢個以金錢掛帥嘅世界,佢竟然唔係專注搵錢,反而去做慈善公益,值得好多企業家參考。

牛總亦坐言起行,公司實務上嘅問題就交由總裁兼執行董事楊文俊回答,楊總提到一月至五月份嘅銷售符合預期,公司會按既定目標發展,至於公司毛利率面臨壓力漸大嘅問題,佢就話會通過各種手段消化負面影響,相信今年毛利率唔會太大變化喎。

余絲韻