保誠（02378）收購AIA（友邦）告吹，有好多手尾要執，鼓吹收購嘅管理層成為眾矢之的，唔少股東要求佢哋下台謝罪，據聞股東依家仲要求取消向行政總裁譚天忠發放年終花紅，條數有成430萬英鎊咁多，即係大嗱嗱4,846萬港元，睇嚟有排拗。
呢單消息源自英國《泰晤士報》，投資者認為，取消向譚天忠發放花紅係體面嘅做法，而需要為事件負責任嘅，仲包括保誠財務董事Nic Nicandrou、英國行政總裁Rob Devey，涉及嘅年終花紅約198萬英鎊。譚天忠年薪90萬英鎊，年終花紅主要係以股份形式發放，現值約430萬英鎊，相等於年薪約4.8倍。呢單收購咁峰迴路轉，有人歸咎於管理層處事過於草率，所以投資者認為佢哋應該承擔後果，並警告如果保誠照樣發放花紅，將於下次周年大會中遭受股東強烈反對。
至於管理層嘅去留問題，至今仍有好多爭議。英國《金融時報》引述機構投資者話，唔認為譚天忠嘅離去會對業務起重大動盪，仲笑言譚天忠及主席韓偉民呢個組合，會喺未來3個月之內消失。
余絲韻