唔經唔覺，李德麟已做咗金銀業貿易場理事長4年，即將喺新一屆理監事會選舉中卸任。金貿場將於下周二（本月十五日）舉行新一屆理監事會選舉，絲絲聽聞現任副理事長張德熙「坐正」呼聲極高，如無意外，新一屆理事長非佢莫屬。
現時金貿場共有兩名副理事長，除咗張德熙外，另一位係平和金銀嘅陳尚智。張德熙已加入金貿場理監事會多年，絕對稱得上係老臣子之一，事實上，佢近年亦曝光頻頻，經常發表有關金價走勢預測及貿易場發展嘅言論，佢接任理事長一職亦好順理成章。適逢今年金貿場100周年紀念，佢接任亦更具意義。
至於金貿場早前提出擬最快喺今年下半年推出人民幣結算黃金產品，現時已訂出產品合約細則，產品將分為一公斤及三公斤裝，以人民幣報價及定價，清算時就可以用人民幣、港元及美元。
人民幣結算黃金產品會採用現行嘅電子自動對盤系統交易平台，設有莊家，並以機場金庫為合約嘅交收地點，金貿場亦可委託指定清算銀行為實金交割倉庫。
余絲韻