國壽（02628）股東會以前喺北京舉行，尋日移師廣州嘅酒店，董事長楊超話係想方便香港嘅小股東，因為喺北京搞山長水遠，佢哋好難去到。
不過，好可惜係最後嘅出席人數唔算好踴躍，而冇去到嘅股東就真係蝕咗啦，皆因國壽派咗張自助餐券畀股東做「特別股息」，估唔到仲豪過好多香港嘅上市公司。
楊總話喺報章留意到有一間冇派息嘅公司，股東會連點心都冇，畀人揶揄係想慳錢谷盈利。絲絲唔知楊總請小股東食餐好嘅係咪同呢件事有關，不過國壽年賺幾百億，呢啲錢濕濕碎，最緊要股東開心！
余絲韻