滙豐嘅中國新總部大樓下周三舉行開幕儀式，尋日再公布多個好消息，就係滙豐中國副行政總裁黃碧娟（Helen）再上一層樓，接替翁富澤升任行長兼行政總裁一職，雖然話呢個任命仍有待監管當局批准後先至生效，但行事向來審慎嘅滙豐宣布得，都應該十拿九穩，絲絲喺度先同Helen講聲恭喜！
Helen由香港調上大陸做滙豐中國副總裁都唔夠一年，咁快坐正真係厲害。早前已有小道消息傳佢會坐翁富澤個位，當時絲絲嚇咗一跳，因為咁等於升完再升，但諗諗吓唔係冇可能，當年翁富澤○四年中突成為滙豐中國副總裁，唔夠一年就代替葉迪奇做咗滙豐中國業務總裁。
Helen升任行長兼CEO係實至名歸，佢九二年已加入滙豐，於大中華及亞太地區從事商業銀行及投資銀行業務超過25年，擁有相當豐富嘅銀行業務經驗。至於翁富澤去向如何，就有待滙豐下一步嘅公布。
余絲韻