被視為華爾街「親華派」嘅摩根士丹利亞洲區主席羅奇，○七年開始派駐香港至今已有3年，大摩尋日公布佢會喺七月一日回歸美國，並到耶魯大學任教，不過並唔代表佢與亞洲嘅「情緣」結束，事關大摩已成功邀請佢調任亞洲區嘅非執行主席，未來佢會維持每月到訪亞洲一次。
由於長期喺亞洲工作並關注中國經濟發展，羅奇早被認定為華爾街嘅中國經濟分析權威之一。佢多次發表「撐」大陸嘅言論，被認為是中國嘅老朋友。
最明顯嘅一次係兩個月前佢與諾貝爾經濟學得主克魯格曼駡戰，當時「克老」建議美國施重壓令人民幣升值，羅奇直斥此為「非常不智嘅建議」，就住呢個議題，雙方來回對罵咗幾轉。
羅奇下月重回美國，主要係由於佢獲耶魯大學嘅管理學院及傑克遜全球事務學院聘任，主力教授與中國經濟相關嘅課程，佢聲言要改變世人對大陸嘅誤解。佢今年64歲，自言過去幾年好似攞住個「皮篋」做人，返美國就可與家人團聚。不過即使佢重返美國，大家仍有唔少機會分享佢對亞洲及中國經濟嘅見解與分析。大摩話羅奇雖然只做亞洲區非執行主席，但未來仍會繼續與亞洲及世界其他地區嘅客戶、政府機構及監管者接觸會面。
余絲韻