港股昨日再升234點，恒指收報19,431點。詩詩未知港股反彈可否持續，早於周三先行沽出越秀地產（00123），結果昨日睇住佢升。見大市投資氣氛有所改善，加上旭光（00067）現價確實低殘，詩詩昨日以均價1.81元買入20萬股，計劃作較長線投資，博股價有機會翻一番。
大市連彈兩日，昨日二三線股仔好似有番鑊氣，加上唔少股仔已跌至相當低殘水平，係時候重出缸湖搵食。中國電力新能源（00735）在上周四曾隨大市急挫，股價一度低見0.65元，但當日終重返0.7元水平收市，近日亦能守穩此水平。
集團已公布○九年度業績，全年純利按年猛增13倍至1.53億元，超出市場預期。集團計劃在未來幾年，將權益裝機容量由目前的861兆瓦提升至1,900兆瓦，估計未來幾年中電新能源的盈利可維持大幅增長。
另一方面，有消息指集團今年內將繼續收購潔淨能源發電項目，由於業務受惠國策，兼且有理想發展前景，較早前有報告將其12個月目標價定為1.35元，較現價接近翻一番。同旭光情況一樣，經過一輪調整，中電新能源現價已屆吸引水平，可買入博股價爆升，止蝕則定於上周低位0.65元。
詩詩