金融海嘯後，內地推出4萬億人仔刺激經濟方案，其中銀行借咗唔少錢畀地區政府推出嘅城市建設投資公司。瑞信亞洲區首席經濟分析員陶冬前日發表一份題材好「Sharp」嘅報告，話收到風有銀行想收番500億至1,000億人仔貸款，擔心會帶起連鎖反應，不過佢呢個說法竟然畀自己嘅同事否定。
陶冬話關注收番貸款導致信貸緊縮或市場波動，睇嚟佢有啲擔心；不過另一邊廂，瑞信銀行股分析員竟然好快咁出咗個關於中國銀行業嘅報告，引述番陶冬嘅料，但就話呢啲城市建設投資公司嘅項目係發改委批嘅，中央冇可能畀銀行中途藉詞收番筆錢，而且銀行亦未必有權力收番未有出現違約嘅貸款。
瑞信話銀行應該係想趁中銀監逼佢哋將嗰啲貸款撥做不良貸款之前拎多啲「揸拿」，一係拎到多啲抵押品或者保證，真係想收番筆貸款嘅機會唔大。同一間行有相反意見，從好嘅方向睇，係說明大家有獨立思維，唔好嘅係令投資者無所適從。
余絲韻