美聯（01200）曾經喺○八年上演控股權狙擊戰，創辦人兼主席黃建業好唔容易先至重奪大股東地位，點知尋日傳出佢大手減持股份，持股量好可能跌到得番5.01%，絲絲尋日搵唔到黃主席解畫，發言人就話不予置評。有塘邊鶴就分析話，近日股市咁波動，唔知黃主席係咪睇淡後市？抑或係學佢成日講嗰句口頭譂「Cash is King」？
絲絲睇過佢哋嗰份銷售文件，黃建業透過里昂證券以每股5.84至6.17元配售4,000萬股美聯股份，並可以加碼2,000萬股，6,000萬股佔公司發行股本8.29%，喺減持後，黃主席持有嘅美聯股權將由13.33%大幅降至5.01%，而配售價較美聯尋日收市價6.49元折讓4.9%至10%。
如果用上限6,000萬股計數，黃主席最多可以套現3.7億元，呢批股份佔美聯已發行股本嘅8.29%，都咪話唔大Lot。絲絲喺聯交所嘅權益披露資料庫睇到，截至五月十二日止，黃建業夫婦合共持有美聯13.33%股份，喺減持後股權得番5.01%，僅僅符合需披露股權變動嘅規定。
美聯喺○八年受到神秘投資者梁向榮連番狙擊，黃、梁二人展開控股權爭奪戰，爭奪大股東地位。梁向榮持股量一度增至12.11%，首次超過大股東黃建業，其後黃建業反擊，陸續增持股份至13.03%，但仍然不敵梁向榮持有嘅14.14%；不過，梁向榮又好快咁減持股份，黃建業重奪大股東地位。根據聯交所權益披露資料，截至去年一月十六日止，梁向榮持有4.48%美聯股權。
余絲韻