市場熱線：天能隨時撻着

不過，連續兩日反彈成交唔算特別多，昨日略減至689億元，但要注意係正因為成交唔多，大戶要舞高弄低更容易。撞正今日期貨場結算，古勝暫時難以識別大戶想開大定開細，繼續留意資金流向，大戶一直狙擊散戶資金流，當散戶資金認定魚缸插水，個個轉軚睇淡時，好可能係大戶殺完好友再劏淡友的序幕。

大笨象料跑輸渣打

思捷（00330）衰咗五個交易日，昨日終反彈6.8%，成為大隻佬升幅冠軍，多得歐元匯價兌美元在1.22水平開始靠穩。中信泰富（00267）跟中鋁（02600）分別升6.4%及5.7%，因為袋鼠國官府就資源稅展開商討，或將回報下限上調至12%。富士康（02038）再出現第十二跳，但未有阻礙股價反彈，昨日升4.2%，收報5.93元。

大笨象（00005）斯人獨憔悴，逆市微跌，盤中更曾低見68.95元，收報70.1元，險守70元大關。由於大笨象接近五成的盈利來自米字旗國及歐元區國家，近日歐元跟英鎊仆直，估計大笨象今年將出現4.55億美元的匯兌損失，相對渣打（02888）有關損失只有2,800萬美元，預期大笨象今年會一直跑輸畀渣打。另一重量級祖國移動（00941）亦未有跟隨魚缸跳彈床，股價逆市跌0.5%，報收72.35元。

祖國魚缸逐漸靠穩，似乎在現水平進行整固，紅色錢莊再反彈，古勝一直強調，只要係長線投資，紅色錢莊有買貴、冇買錯，肯坐貨三五七年，股價有機幾級跳，尤其係建行（00939）同工行（01398），將會取代二三十年前買大笨象可致富的地位。

電動自行車銷情佳

二三線股仔昨日有番些少生氣，鑊鏟友亦略展歡顏，但目前成交尚未配合，落鑊炒股仔都係見好即收，在下傾向搵實力股上車，即使市況未能擺脫弱勢，亦有條件再坐一會。古勝今年選股有四大行業係優先目標，包括環保、內需、醫藥股同科技股，呢幾個行業都受惠國策，同時唔受調控政策所影響，值得逢低吸納。

天能動力（00819）為祖國最大電動自行車動力電池供應商，銷售額連續11年全國冧巴溫。天能舊年份成績表幾靚仔，在營業額減少12.8%至22.5億元（人仔．下同）的情況下，盈利卻增15.6%至2.7億元，皆因鉛價回軟，毛利率上升6%。天能不但能受惠環保政策，集團同樣受惠「家電下鄉」政策，因電動自行車屬第10類補貼家電品種，預期今年銷量激增，天能係電動自行車的最大動力電池供應商，亦水漲船高。

古勝