絲絲講場：鄭海泉「請假」疑雲未散
尋日滙控（00005）一年一度嘅股東會，幾乎所有高層都有現身，包括傳聞請咗兩個月假嘅鄭海泉，佢巧妙咁話「冇請兩個月大假」，但假期疑雲未吹散，絲絲打咗咁多年工，都知道假期分好多種，就算唔係大假，仲有其他形式嘅假期可以放好耐，咁鄭大班係邊種，自己估啦！
出席總部開幕「睇吓點」
鄭大班依家係中國業務掌舵人，答記者問題一向都好小心，今次答得好巧妙，佢冇真正咁否認，所以絲絲認為疑雲未散。另一個好大嘅疑點，就係滙豐下月初會喺上海嘅新中國總部搞開幕儀式，作為掌舵人，佢竟然話「到時睇吓點，到時話你知」。依家距離新中國總部開幕只係淨番兩個幾禮拜，佢竟然話未定係咪出席，唔單只罕有，仲好弔詭。
佢同集團主席葛霖嘅退休傳聞都係焦點，行政總裁紀勤尋日話葛霖暫冇計劃退休，之不過集團對主要職位有接任計劃，至於鄭大班都話未有退休計劃。
小股東押注退休金重傷
近兩年嘅股東大會氣氛冇以前咁和諧，尋日有好幾位揸咗「5號仔」廿幾卅年嘅老股東，佢哋話與滙控共度時艱一齊供股，今年業績好轉，質問點解唔增加派息？又質疑滙控股價升極都升唔起，令股東好心傷。最傷者莫過於一名小股東話用咗自己一半退休金，喺股價超過140蚊時買入「5號仔」，點知依家跌到得番一半。紀勤都係講番嗰幾句，話採取漸進派息政策，首三季派息一樣，年尾再計數。
余絲韻