市場熱線：華創收益理想

大隻佬提防「彈散」

本地魚缸隨住祖國魚缸升幅擴大，扭轉開市跌勢，恒指一度升逾200點，更重越19,700點水平。可惜午後歐洲魚缸開市，高開後迅速回落，恒指升幅收窄至121點，收報19,667點；國企指數則回升194點，收報11,242點。現貨場成交額646億元，唔算特別多，相對祖國魚缸以高於2,000億元人仔成交配合升勢，本地魚缸明顯未擺脫弱勢。古勝執筆時，歐元兌美元再跌穿1.24水平，歐洲三個主要魚缸指數箭嘴向下，看官怕且唔需要對各地魚缸抱以厚望。

藍色大隻佬普遍反彈，惟古勝認為係「彈散」居多，大笨象（00005）逆市下跌，除要面對花旗通過金融改革方案，或對金融機構加強監管的負面消息外，揸fit人亦有可能變動，為其平添不明朗因素。其股價昨日下跌1.3%至71.65元，要睇70元心理關口守唔守得住。

另一重量級祖國移動（00941）亦偏軟，逆市跌0.6%或0.45元，收報74.2元，維持弱勢。大隻佬表現最好係紅色地主，華潤置地（01109）跟中國海外（00688）分別升7.3%及6.1%，分別成為大隻佬升幅冠亞軍。不過，發改委已澄清未有講過三年唔推房產稅，唔知道反彈可以維持幾耐，睇樣都係「彈散」居多。至於本地地主，昨日亦隨魚缸反彈，奇怪係昨日賣地成績一般，古勝認為本地地主反彈幅度多咗些少。

北大人跟「山姆叔叔」的第二輪戰略與經濟對話，昨日於北京召開，雖然孖屐再憧憬雙方會討論人仔升值問題，但在下講過，在歐元區的債務危機未解決前，佢哋實在缺乏要求人仔升值的籌碼。三架紅色飛機昨日繼續升空，升幅約5%至7%。皆因發改委上周五公布，自六月一日起民航國內航線頭等艙、公務艙票價具體價格可由航空公司自行確定，對三架紅色飛機股價帶來支持。「大魔頭」亦唱好，指一線航空股現時下跌空間有限，建議增持國航（00753）。

24元具不俗支持

昨日古勝都講過，目前市況以內需股最穩陣，其中屬龍頭級數的華潤創業（00291）昨日派首季成績表，盈利勁升7.94倍至37.27億元，每股盈利為1.56元，撇除一次性項目出售的收益，由持續經營業務貢獻的公司股東應佔基礎溢利增加25.6%。錄得如此佳績，華創的現價市盈率有所回落，目前已重返較合理水平，現價買入即使唔會有好大上升空間，但遇上魚缸屠殺，同樣唔跌得去邊，24元有頗強支持，料可發揮資金避難所作用。

古勝