五、六月份係股東會高峰期，好多小股東問完管理層正經嘢之後，都會食番餐。上市公司老細好體貼股東，為咗令佢哋食得安心，依家好流行派食物券，一人一份秩序好。呢種風氣喺台灣就更盛，佢哋唔係派蛋糕點心咁簡單，而係好基本嘅白米、生油。絲絲聽聞有老人家事前收到風派米，仲拖個行李篋去參加股東會。
老友話，根據台灣非正式嘅統計，白米係最熱門嘅股東會紀念品，其次就係橄欖油、沙拉油及醬油等。面對各式各樣紀念品，有股東攞住股東會通知書，要諗吓究竟應該去邊間公司攞紀念品，佢哋會計吓數，米貴啲定係生油值錢。
據講白米最受歡迎，因為反正大家都可以食，比較實際，約有十幾家公司選擇送米或麵條；有咗米仲要炒菜，不論係橄欖油抑或醬油，統統都有人送。當然有公司會有另類高檔貨送畀股東，例如係多媒體小音響、LED留言板、微波爐餐盒、便利店禮券等，小股東以往空手而來，依家就要拖住行李篋周圍走。
余絲韻