絲絲講場：上市委隨時有人唔玩
每年五月至六月，港交所（00388）新一屆上市委員會名單就會公布，睇番現時上市委員嘅成員名單，今年未有成員因為任期已達6年上限而要退任，不過咁樣係咪代表全部成員都可安然「過渡」，就要到時睇過至知。
管治冇進展 意興闌珊
自從去年初延長董事禁售期風波後，外間特別關注上市委員會嘅布局。禁售期風波後，政府、證監會及港交所對上市委員會成員嘅委任睇得好緊，去年就加入咗唔少與商界關係密切或「友好」人士入局，加上上市委員會一向支持要求主板公司公布季度業績無法推行，已成為「長期目標」，以及「一般性授權」又原地踏步，即維持現行可發行兩成新股嘅做法等，聞說有部分對企業管治睇得好重嘅上市委員感到有啲意興闌珊，未必會尋求連任。
再講，政府近年大力倡議海外公司來港上市，有外界聲音指上市委員會近年喺審批新上市公司方面除咗監管角色外，亦愈來愈重商業角色。
究竟有上市委員唔再尋求連任嘅傳聞孰真孰假，大家唔使猜測，好快會有分曉！上市提名委員會有6名「話事人」，3人來自港交所非執行董事（包括主席夏佳理），另外3人就來自證監會（包括主席方正及兩名執行董事）。
余絲韻