建行（00939）呢排要換會計師行，與共事7年嘅畢馬威講Bye Bye，並公開招募另一間會計師行。老友就話，審計費問題當然係導火線之一，而最重要係建行嘅大股東匯金想啲銀號與會計師之間嘅關係獨立啲，怕佢哋「日久生情」，察覺唔到問題，所以逼佢換畫。
老友話，查實審計費用會隨經濟表現而變化，市道唔好之時都有減價。畢馬威收取建行嘅費用應該唔係最貴嗰間，不過物價貴咗，就梗係想加少少，大家本來冇乜異議，之不過大股東匯金一直希望推行「輪替」制度，即係要求上市嘅三大銀行嘅會計師好似坐音樂椅咁轉吓，以免四大會計師行與銀行高管熟得滯，減低審計嘅獨立性，所以就借機由建行先行做試點嘞。
於是建行就舉行咗「選美」，老友報料話，四大會計師行都有派人參加，不過依家四大會計師行各審計一間國有商業銀行，如果一間會計師樓同時負責兩間銀行嘅Audit工作又得唔得呢？原來匯金打算推出「一審二」模式，即係一間會計師可同時審計兩間上市銀行。不過亦有業內人士質疑呢個做法，農行都打算上市，睇嚟都要跟大圍做法。
余絲韻