絲絲講場：中銀大廈廿周年搞名牌騷
矗立喺中環嘅中銀大廈大大話話都起咗成廿年咁耐，當年落成成為一時佳話，皆因係由著名建築師貝聿銘所設計，中銀就趁住呢個廿周年機會，跟時裝界大名牌Salvatore Ferragamo首次攜手搞咗個為期四周嘅「Living Art」展覽，展出佢哋喺佛羅倫斯博物館所展示經典鞋款嘅複製品及手袋款式。
Salvatore Ferragamo有個花名叫「飛甩雞毛」，係名媛至愛品牌之一。今次展覽嘅地點係中銀大廈嘅大堂，咁就腳嘅地點，連一般平民百姓都可以睇到大名牌經典之作。尋日展覽開幕，大會更搵嚟Ferragamo意大利總部嘅鞋匠示範造鞋技術，但絲絲相信女士們對展覽品嘅興趣一定大過睇人造鞋。
下月時裝展係主菜
講咗咁耐都係屬於前菜，主菜應該係佢哋喺六月十一日於中銀三樓舉行嘅「二○一○秋冬男女時裝展」，當晚仲有個慈善晚宴，屆時Ferragamo嘅創作總監Massimilano Giornetti都會出席盛會，呢次更加係佢首次喺亞洲發表首個女裝系列及最新男裝系列，相信定會吸引好多名人到場。
余絲韻