改名係一門好深嘅學問，父母為仔女改名，往往會參照當時嘅社會背景以及對子女嘅期望，有時又會用嚟紀念某啲事件。
「港生」、「京生」、「國棟」呢啲名相信大家都耳熟能詳，某程度都可以反映到一個人或者時代嘅背景。平保（02318）嘅新聞發言人叫盛瑞生，但原來佢個名係有段不一樣嘅故事，佢原本名叫衛生，喺細個時老師幫佢改名叫瑞生。話說盛瑞生有個哥哥叫盛衛星，皆因阿哥出世嗰陣中國射咗個衞星上太空，事實上當年中國掀起太空熱，好多人都改名做衛星；到盛瑞生出世時，屋企人就想跟番個「衛」字，但又好似冇乜特別名好改，於是改名叫衛生。
到讀書嗰陣，老師覺得衛生呢個名唔係咁好聽，怪怪哋，於是就同佢改名做瑞生，因為「瑞」字與「衛」字嘅普通話音差唔多，但叫做瑞生就梗係靚啲啦，加埋個姓，大有鼎盛、祥瑞、生猛嘅意思。
余絲韻