絲絲講場：張耀堂晒球技捧美斯
南非FIFA世界盃進入倒數階段，一眾球迷已準備就緒迎接呢項球壇盛事嘅來臨。平時西裝筆挺示人嘅VISA香港及澳門地區總經理張耀堂（Sunny），尋日出席VISA世界盃推廣活動時就換上一身球裝，展現活力十足嘅一面。
Sunny尋日親自落場與參賽者比併球技，控波有板有眼，一睇就知佢係足球愛好者，佢就好謙咁話自己已高掛球靴多年喎。
雖然VISA作為南非世界盃嘅全球贊助商，但Sunny話今次應該無緣去南非親身觀賞賽事。講到熱捧球星，佢話依家最鍾意嘅係世界足球先生、阿根廷國腳美斯，對佢出眾嘅腳法讚不絕口。商業社會凡事講求緊貼市場脈搏，相信Sunny亦深明此道。唔講唔知，原來Sunny嘅心水球星係英格蘭「萬人迷」碧咸，但佢笑言要跟吓潮流，所以依家就轉咗捧美斯場。
余絲韻