絲絲講場：華懋棄用陳振聰Design

自從龔如心胞弟龔仁心出任華懋集團主席後，近幾個月公司有唔少新猷，絲絲發現佢哋公司網頁亦剛啱換咗新貌，新網頁只有「華懋集團」四個大字及公司英文名稱，而由陳振聰設計、沿用咗約17年嘅禾穗商標就棄用咗。

新網頁首頁當然係展示香港嘅海港靚景，最搶眼自然係龔如心嘅得意之作──如心廣場。網頁寫嘅「建樹未來」四個大字係集團目標，「優質生活」、「熱心公益」、「超卓管理」及「完善配套」就係集團發展理念。

絲絲覺得個網頁設計比之前年輕及有活力，Click入集團簡介一欄，清楚列明公司嘅架構及從事業務，仲有王德輝及龔如心兩人成立華懋慈善基金有限公司嘅理念。

華懋一向從事物業投資相關嘅業務，好似物業發展、酒店業務及物業管理，原來另有兩瓣業務已成為集團五大業務範疇之一，包括金融投資和財富管理部門，以及好少聽嘅華懋娛樂事業，可惜網頁內未有進一步描述，唔知除咗戲院之外，華懋仲會有乜嘢娛樂事業呢？

余絲韻