作為大藍籌，中移（00941）一直係唔少股民嘅心頭好，不過近年因為競爭加劇而搞到公司增長大幅放緩，股價表現大不如前，令好多中移「粉絲」大為失望。唔知係咪咁嘅原因，尋日中移股東會就特別吸引到好多股東到場，就連董事長王建宙都話，尋日嘅股東會係咁多年嚟最多小股東到場嘅一次。
小股東嚟到當然唔係食吓茶點咁簡單，據絲絲觀察所得，尋日中移小股東嘅提問較往年為多，而且相當有質素，好似有位小股東話，好多股東都係以百幾蚊買入中移股份，但依家公司已經變為公用股，問王總點樣幫公司重拾增長。對於股東嘅憂慮，王總話佢全部都聽到晒，佢時時刻刻都以提高股東回報為責任，仲話無論去到邊度都會最少每3個鐘Check吓股價，仲話唔睇唔舒服咁話。
至於點樣幫公司重拾增長，王總當然唔介意將近期嘅「代表作」——入股浦發行嘅賣點，再向小股東講解多一次啦。
除咗點樣幫公司重拾增長，中移亦有一啲屬於環保分子嘅股東，其中一位股東就提到，公司每年都將又大又厚嘅年報寄畀股東，塞爆晒佢哋嘅信箱，問公司可否以光碟代替。對此公司就回應話，寄年報畀股東係相關法例規定，但若果唔係實名股東，就可以選擇以光碟代替喎。
余絲韻