絲絲講場：任志強被掟添人氣

內地華遠地產董事長任志強上周五喺大連出席一個論壇時畀人掟鞋，仲自嘲獲得「總統待遇」，成件事畀佢老友、SOHO中國（00410）董事長潘石屹喺微博詳盡「報道」。任志強剛周六喺微博開腔講心情，話當日嘅主辦單位問佢使唔使追究嗰位「掟鞋男」，佢就話「不想給這個孩子的一生留下傷害，也無意借此給媒體創造話題」。

內地傳媒對呢位掟鞋男嘅身份極度好奇，估計佢係「房奴」，不過任志強就話「胡說八道」，仲話掟鞋男應該連首期都畀唔起。