絲絲講場：天源上市冧巴邪？
中國人一向對於數目字都好信邪，估唔到呢種傳統智慧連公司上市都啱用。話說上周有3隻新股被「腰斬」，當中天源礦業（01028）揀嘅股票編號竟然與去年十月擱置上市嘅卓越置業一模一樣，兩間公司同一個冧巴，事隔唔夠一年竟然先後被「腰斬」，你都咪話唔邪！
冧巴翻用 同一命運
絲絲聽講，按照香港公司上市慣例，新上市公司會選擇捐50萬元或100萬元畀公益金，如果捐多啲，可以選擇嘅股票編號就會多啲，又或者你可以選擇唔捐，咁港交所（00388）就會求其編個冧巴畀你。
不過，好似天源與卓越咁，事隔唔夠一年就用番同一個冧巴嘅情況就比較少見，而且兩間公司竟然齊齊被「腰斬」，命運出奇咁相似，就真係幾得人驚囉。
其實不祥號碼可算係無處不在，好似中國人好忌諱「四」字，外國人就好怕「13」，就連樓層數目有時都會避用呢啲冧巴。不過，查實迷信呢樣嘢古今中外人皆有之，講到底都係信則有、不信則無啦！
余絲韻