上星期全球股市大震盪，詩詩能夠力保不失，都算係咁。目前持有光大國際（00257），話就話係長線投資，但若然市況繼續疲弱，甚至步入熊市，詩詩有止蝕離場的需要，即管睇埋今個星期市況如何發展，或趁反彈清倉。上周五早段見御泰中彩（00555）回吐壓力唔大，以每股0.86元買入20萬股小試牛刀，此股之後逆市上升，唔排除有後着。不過歐美市況太差，要有心理準備由贏變倒揩。
歐洲債務危機愈演愈烈，又怕內地再有政策出籠壓抑樓市，要避開金融同地產股，可選擇受惠於扶農政策的第一拖拉機（00038），因其並非調控對象比較安全，加上其股價累積下跌唔少，至現水平應有一定支持。睇番其首季業績理想，有助抵銷近期嚴重旱災對集團業務的潛在影響。
估值方面，一拖最新每股資產淨值3.78元，以現價計算，市帳率只有1.3倍，估值合理。一拖持有淨現金10.66億元，財政狀況健康。綜合券商對集團的盈利預測，一○年度盈利3.6億元，增長達47%，預測市盈率約10倍。以預測市盈率15倍計算，股價可見6.15元。詩詩建議待一拖股價回調至4.5元以下吸納，跌穿4元止蝕，以6.15元目標價計，潛在升幅逾三成。
詩詩