孖妹缸湖遊：金融界靚媽親授財藝

陶葆璇：自主思考 培訓理財

Teresa：花旗銀行私人客戶業務總監陶葆璇

陶葆璇（Teresa）最近轉咗負責私人客戶業務，即係服務啲資產總值達100萬美元以上嘅高淨值人士，工作愈來愈忙，不過佢為咗可以同13歲嘅囝囝Douglas有更多時間相處，所以周一至周五會百分百專心工作，目的係希望假日可以全情投入家庭生活。

莉莉：你連辦公室都放咗Douglas張相，睇佢黑黑實實，個樣有啲似韓國人喎。

Teresa：可能佢成日踢波同打籃球，所以曬到有啲黑。記得佢出世已經有8磅重，都算係肥BB，我哋兩個都係十月生日同屬天蠍座，每年都會一齊慶祝生日。

高妹：Douglas出世時一定好可愛嘞，你當時已經幫佢準備咗教育基金？

Teresa：教育基金由佢3歲開始供，18歲可以拎錢，主要用作外國升學時嘅費用。不過我同佢講，讀書最好拎獎學金啦，一來證明自己努力，二來又可以揀自己鍾意讀嘅大學。另外，我喺九二年亦加多咗個月供基金，算係多一個準備。

莉莉：唔知Douglas理財叻唔叻呢？

Teresa：佢有個儲蓄戶口存放零用錢及利是錢，依家都有萬幾蚊，佢要買嘢就會用自己錢。例如佢好想買一個300蚊嘅遊戲帶，但返學又要買手提電腦，咁我就會教佢，購物前要衡量物品嘅需要性及真正價值，要佢用腦去分析思考，將要購買嘅物品排列一個先後次序。

生活作例 灌輸金錢觀

高妹：人哋話金錢係萬能，你會點樣向阿仔解釋金錢嘅定義呢？

Teresa：我鍾意用生活例子講道理，好似一部手提電腦賣三千幾蚊，喺屋企做嘢嘅姐姐（指菲傭）每月人工又係三千幾蚊，由佢去思考金錢嘅真正價值。

高妹：其實你係咪都想阿仔長大後做番金融？

Teresa：我都經常問自己呢個問題。阿仔計數都幾叻，有時候我哋會一齊睇道指，佢又會問乜嘢叫做股票和Index（指數），發現佢對金融都有啲興趣。不過如果佢有自己嘅理想，都唔會逼佢做番呢行。

莉莉：哈哈，不如講吓你心目中最感動嘅母親節吖？

Teresa：喺阿仔8歲嗰年嘅母親節，當日夜晚9點幾，兩父子話要落街行吓，原來佢哋專登去買一大紮康乃馨送畀我，Douglas仲好用心寫咗首歌頌母愛嘅英文詩，令我好驚喜、好感動。

李紹莉：每日獎賞 學懂付出

Julia：ING投資管理批發銷售及業務發展香港區主管李紹莉

Julia自言事業心強，當初決定生BB無疑係個大考慮，不過佢坦言：「我冇後悔過，因為Trinity（囡囡）和Gavin（囝囝）令我嘅生命變得更加完整。」成功媽媽唔係天生嘅，所以Julia睇好多兒童教育嘅書，甚至陪囡囡一齊學彈鋼琴學足兩年，課餘之後仲兩個人「撐枱腳」，鬼咁溫馨。

莉莉：聽講你教Trinity嘅理財習慣都係全靠睇書。

Julia：囡囡由4歲時開始，只要有良好表現，我就會每日畀兩蚊佢儲起，目的係想佢知道，爸爸媽媽要辛苦工作先會有錢。有好表現就會有兩蚊，類似一個Role play（角色扮演），等佢有個本分，而且明白有付出先會有收穫。

高妹：呢個方法會否用喺Gavin身上？

Julia：囝囝依家只得3歲，但佢好有性格，與家姐有啲唔同，但我都會先用呢個方法教佢理財，如果唔得就再睇吓書或改變策略，始終每個小朋友特質唔同，父母喺教育時要識變通。

早買保障 投資不求人

莉莉：一個月有30日，如果Trinity好乖就會有60蚊，佢點用啲錢？

Julia：哈哈，其實佢都幾慘，因為喺呢60蚊入面，佢要將一成捐畀教會，一成捐畀其他慈善團體，一成畀爸爸媽媽，一成用作儲蓄，其餘嘅錢就可以用。

高妹：嘩，即係Trinity要畀番家用屋企，好得意呀！

Julia：其實呢個係家庭責任，喺子女細個時就應該教育。重點係囡囡已經明白儲錢嘅好處，初時頭一、兩個月佢都會話去買嘢，但之後有成年時間冇用過啲錢，因為佢知道儲得愈耐，錢就會愈多。

莉莉：咁你又有冇幫Trinity及Gavin計劃教育基金？

Julia：囡囡出世時幫佢做咗教育基金，另外仲有月供基金。但我和丈夫之後都覺得，我哋識得投資，其實唔需要將啲錢特別去買坊間所定性嘅教育基金，正如保險，我哋都只係純買人壽、危疾，而唔會買有投資成分嘅儲蓄保險計劃。

高妹：生咗兩個BB，身材都咁Fit，你好勁呀！

Julia：我好貪靚，以前讀書時有人話我肥，我就即刻去減。總之做女人唔可以懶，一定要Keep住做運動與扮靚。有時囡囡都會問：「點解其他媽咪冇你咁靚嘅？」聽到呢句都開心晒啦。

69%人料港股應驗「五窮」

五月有開心嘅母親節，但亦有股市「五窮六絕七翻身」之言，喺近期中央打壓樓市及歐洲債務危機愈演愈烈嘅情況下，唔知股友認為五月港股會否應驗「五窮」呢？根據《東方產經》網上民調顯示，截至上周末晚上6時，話「會」嘅有68.9%，話「唔會」嘅就有31.1%。

高妹、莉莉

若有料報畀高妹同莉莉或有嘢問，可電郵money.biz@opg.com.hk