絲絲講場：任志強：捱「揍」我排第3
有內房「任大炮」之稱嘅華遠集團總裁任志強向來語出驚人，唔單止曾經大鬧「八十後」年輕人不自量力，冇錢學人買樓，上月仲喺博客發表萬言偉論，直斥「國十條」違背市場規律，可想而知佢幾「敢言」。任志強亦自知平日樹敵無數，好多人想打佢，不過佢就相當謙遜，話自己只係全國同胞們心目中「最想揍」嘅第三位仁兄。
同胞「最想揍」係小泉
呢番說話係任志強早前接受內地傳媒訪問時講嘅，唔知係自嘲抑或講笑，佢竟然形容自己係全國人民「最想揍」嘅人之一，但並非係緊隨台灣前總統陳水扁之後嘅第二人。
佢話全國人民公敵之冠應該係日本前首相小泉純一郎，第二係陳水扁，第三個先輪到佢。絲絲客觀啲睇，任志強嘅器量總算勝人一籌，試想被同胞圍剿嘅時候，佢仲識得幽自己一默，已經好唔簡單。
不過所謂時勢造英雄，既然時不與我，任志強當然要面對現實諗退休喇，所以佢亦坦蕩蕩咁表示自己年屆五十九，係時候退休喎。
余絲韻