絲絲講場：交銀做善事「海寶」撐場

依家最流行嘅吉祥物可能係上海世博嘅「海寶」，有佢出現嘅地方自然吸引大朋友、小朋友嘅注目。交銀香港作為世博全球合作夥伴，日前就出動海寶同小朋友打氣，搞到個個都爭住同海寶影相！

交銀香港早排搞咗個「第三屆交心寶寶盃‧全港兒童圍棋大賽」，與過百名小朋友一齊捉圍棋做善事，圍棋棋局千變萬化，可以促進小朋友多元發展，喺對弈中鍛煉邏輯思維，學懂對策，就好似為自己人生做好準備、計劃將來咁。哈哈，同咁細個嘅小朋友講啲咁長遠嘅事，當然要有好多嘢吸引佢哋喇，所以海寶都專登出嚟同佢哋打氣！

絲絲本身唔識捉圍棋，交銀香港搞呢類型活動，唔知該行副總經理陳霞芳（Nancy）會唔會係高手呢？今次成個活動籌到5.6萬元，全數捐畀東華三院作慈善用途，幫助有需要嘅小朋友，Nancy仲親臨現場送支票，認真有善心！

余絲韻