絲絲講場：滙豐嘉年華考驗新官
今時今日，企業要挽留人才，除咗用銀彈政策之外，仲要諗吓其他計仔。好似作為本港最大僱主之一嘅滙豐銀行，佢哋為咗增加一眾員工嘅歸屬感，日前就喺中環總行為個人理財業務員工及佢哋嘅親友舉行咗個嘉年華，當日仲有高層與員工玩遊戲，上下齊心打成一片。
馬凱博麥倩華鬥數銀紙
今次呢個嘉年華吸引超過1,600人參與，而剛啱喺今年二月「新官上任」嘅滙豐香港區總裁馬凱博以及滙豐香港區個人理財業務主管麥倩華亦有到場。
節目方面，滙豐除咗安排參加者參觀總行不同樓層，以及畀員工親友喺3樓銀行大堂一嘗前線員工嘅工作之外，仲設有好多遊戲攤位，不過，絲絲覺得最有睇頭嘅莫過於數銀紙比賽。
馬凱博與麥倩華雙雙落場參加比賽，與數銀紙「高手」──前線員工一較高下，正所謂贏輸唔緊要，佢哋兩個都只係志在參與啫，而且單係睇兩人數銀紙時落力嘅神情，已經夠晒娛樂性啦。
絲絲仲發現，平日戴開眼鏡嘅馬凱博，唔知係咪想展現親切嘅一面，當日特登除去顯得佢嚴肅啲嘅鐵框眼鏡，面上掛着笑瞇瞇嘅表情，直頭可以用個Cute字嚟形容佢。
當日，馬凱博仲親自頒發長期服務獎畀服務咗滙豐40年嘅客戶服務經理陳培娟。
余絲韻