受外圍股市拖累，港股最終都要失守250日線水平，大市料將繼續波動，現時選股宜以穩陣為主。當中，不妨留意專為手機製造商度身製造微型聲學零件的瑞聲聲學（02018），皆因隨着內地3G換機潮，加上國家早前又表示，今明兩年會投資4,000億元人民幣作3G建設，預料3G用戶目標人數將由現時約1,800萬戶激增至1.5億戶，故集團身為手機聲學零件銷售商，自然可以受惠。
瑞聲聲學現有客戶除諾基亞及摩托羅拉外，早前成功爭取新客戶蘋果iPhone及三星，集團往後盈利料可繼續保持高增長。故此，即使面對近日大市波動，集團股價亦表現硬淨，一經突破，隨時再展升浪，宜吼位買入，首步目標睇15元。
跟手就揀嚟招金礦業（01818）作為配腳，原因除貪其股價昨日逆市做好，升4.5%之外，亦看中其防守力強的特性。雖然金價在過去兩日略有回落，但整體走勢仍持續向好，加上傳統智慧話，黃金是跌市下最佳的避風港，所以相信招金短期仍會惹來資金追捧，值得加以跟進，短期有望向上次高位17.55進發，穿14.5元止蝕。
最後就揀來中國重汽（03808），集團股價由高位11.58元回落至今，累積跌幅已逾三成有多，昨日股價更曾一度低見7.17元，惟見過低位後，跌幅有所收窄，最終收市只微跌0.94%，走勢上似乎已尋底成功，博其股價短線會有反彈，目標睇8.1元，穿7元止蝕。
帥哥