上市公司私有化，股民最關心係作價是否合理以及獨立財顧嘅意見，但私有化文件嘅其他內容大家又有冇留意呢？將於下周三（本月十二日）表決私有化計劃嘅和電國際（02332）應美國證交會要求，提交有關私有化嘅修訂資料，內容真係巨細無遺，連管理層過往無主動披露嘅收購要約，實際參與嘅管理層都一一詳細交代！
美國證交會有幾高要求？好似和電過去兩年與第三方就可能出售個別業務嘅可能接觸，本港私有化文件只作簡單介紹，不過和電向美證交會提交嘅最新修訂資料，就非常具體咁交代：喺○八年八月、十二月及○九年八月，和電嘅印尼、越南、斯里蘭卡及泰國業務分別獲不同證券行代表嘅獨立人士提出收購建議，公司並交代當時負責接觸嘅管理層成員。
至於今年一月四日和黃（00013）向和電提出私有化嘅具體過程，包括當時參與討論嘅和黃董事局成員、和黃董事局向和電董事局提交私有化建議嘅具體時序，以至參與接洽嘅和電董事局代表，都有好詳細交代。唔怪得絲絲嘅「賓卡」老友成日都叫啲企業去美國掛牌前真係要諗清楚，以免一入豪門深似海。
余絲韻