絲絲講場：滙豐「理財學堂」開課麥倩華打頭陣
依家不論大人或細路都好講求理財，滙豐銀行近年亦不遺餘力推動呢個概念，佢哋今年嘅「理財學堂」就喺上周正式開課，參加者來自17間中學嘅超過300名中三至中六學生。第一堂就搵嚟香港區個人理財業務掌舵人麥倩華（Francesca）主講。
16歲做兼職賺錢
學生對Francesca點樣用第一份糧好有興趣，於是就向佢問咗一條咁嘅問題，Francesca透露自己喺16歲時已出嚟做兼職賺零用錢，喺零售店同埋餐廳做過，當時佢將一部分辛苦賺番嚟嘅錢儲起，其餘就用嚟買雜誌、買衫。
在場又有學生問Francesca如果突然多咗一大筆意外之財會點用，佢就話會將部分錢捐畀慈善機構，幫助弱勢社群，有部分就用嚟照顧屋企人嘅需要，而唔會因為多咗筆錢而改變依家嘅生活及工作。睇嚟Francesca個人都非常踏實，既善心又顧家，絕對唔係胡亂花費嘅人。
余絲韻