市場熱線：中國南車穩健之選

恒指早段高開逾百點，一度重返二萬一關，可惜升勢未能持續，大部分時間在20,800水平徘徊，散場失守20,800關，報收20,763點，跌48點。國企指數同樣高開低走，報收11,864點，倒跌81點散場。現貨場成交略見回升至555億元，但仍然薄弱，缸邊友態度審慎。

大隻佬大部分下跌，大笨象（00005）死守不失，報收79.05元，散場後公布首季派息0.08美元，跟去年一樣。祖國移動（00941）盤中曾上試77元，但無功而回，散場跌0.06%，報收76.6元。花旗經濟數據令缸邊友相信，花旗經濟復甦，以當地為主要市場的利豐（00494），昨日升5.1%，跑贏其他大隻佬。

內房股未宜沾手

本地地主被官府出招對付，未來在銷售上面對更多限制，屋仔市場或步入調整期。本地地主股價跌幅介乎0.8%至1.9%。太古A（00019）分拆地產仔仔登陸本地魚缸，市場反應麻麻，股價跌近0.7%。紅色地主未見喘定，北京嚴控炒樓，其他城市或有樣學樣，紅色地主無運行，日前反彈不過係空軍回補部分空倉，暫時紅色地主仍不宜沾手。

袋鼠國調高息率一個骨，係市場意料之內，但由於暗示暫停加息，澳元下跌。袋鼠國最近宣布自一二年起開徵40%資源利得稅，玩死已在袋鼠國資源企業插旗的紅色資源股。相關股份續跌，跌幅閒閒地超過2%。

中國南車（01766）昨日升2.2%，「麥記」有吹水報告睇好其前景，指股份可「跑贏大市」，目標價則調高至6.9元。中國南車為內地兩大客車研製商之一，除持有南車時代電氣（03898）56.16%股權外，還包括牽引客運和貨運列車的電力及內燃機車、貨車、客車、地軌地鐵車輛及動車組等業務。

受惠祖國城市化

祖國一直致力城市化，北大人對鐵路建設項目相當重視，預計鐵路網在二○二○年增加30%外，亦將現有鐵路電氣化。由於祖國全力發展鐵路網交通系統。未來數年基本的機車、貨車及客車需求持續上升，古勝相信中國南車可受惠祖國高速城市化，未來五至十年可維持盈利高速增長。

中國南車目前持有980億元人仔定單，加上鐵路相關建設及動車組交付，今明兩年將踏入高峰，可以肯定成績表靚仔，盈利增長有保證。古勝建議趁回吐吸納作中長線投資。不過要留意集團年內或有集資需要，唔排除推高股價批盪。

古勝