咪睇啲投資銀行「賓卡」個個年薪過百萬，仲成日着得身光頸靚，其實打工仔哲學向來唔簡單，喺投行打工更加係難上加難。以前喺內地唔少投行打過工嘅中國大冶有色（00661）主席萬必奇就同絲絲講，話做投行切忌爭功出風頭，喺老闆後面陪笑拍手掌就最好嘞。
絲絲尋日與萬總食飯，發現佢除咗係經濟學博士及工學學士外，原來仲係哲學碩士，佢以前做咗好多年投行，佢話記得有一年經濟環境好差，成間銀行只有佢帶領嘅部門賺錢，當年仲係賺咗250萬元，於是佢喺投行就有咗個「二百五」嘅外號。
不過佢話喺投行打工一定要識做，將功勞及風頭留番畀老闆，好似佢試過有幫一間內地公司搞上市，差唔多全部工作都係由佢一手包辦，不過去到上市掛牌嗰日佢就功成身退，由老闆幫手敲鑼開市，佢自己就企喺後面陪笑拍手掌，無他嘅，皆因怕老闆會妒忌下屬爭功出風頭嘛。
余絲韻