新股近排又熱炒番，尋日就有兩隻新股孖住上，分別係昂納（00877）及思嘉（01863），兩間公司都例牌送見面禮畀港交所（00388），思嘉就送琉璃牛，寓意公司及港交所業務都可以蒸蒸日上，昂納就將自己嘅產品鑲入水晶送畀港交所留念。
呢排新股少咗，港交所收禮物冇以前咁密，根據絲絲嘅非正式統計，查實新上市公司送禮物來來去去都係嗰幾味，琉璃、水晶就佔咗七、八成，喺形態方面，牛、馬、龍算係最多，不過好彩未曾有公司送熊。
比較有心思嘅禮物其實亦都唔少，例如阿里巴巴（01688）上市時，就特登搵人畫咗幅畫，上面有齊18位創辦人嘅Q版公仔「全家福」，幅畫好鬼可愛，依家仲掛喺港交所交易大堂。
余絲韻