上周港股表現麻麻，內地打擊樓市無手軟，港府亦出招規管地產商，在雙重夾擊下，恒指一周累跌逾600點，詩詩投資組合無乜損傷，算好好彩。組合內光國（00257）作中線投資，續持有；至於華億傳媒（00419）周五逆市上升兼高收，可留意於本星期套利。
話就話個市麻麻地，不過無損二三線股仔的炒作氣氛，詩詩炒股唔炒市，大市目前係調整，並非玩完，今日就吼中隻威靈控股（00382），睇番圖表，股價調整接近完成，只要成交配合，隨時可以再爆升浪。
威靈上周宣布終止收購無錫小天鵝旗下華印電器全數100%股權，集團繼續物色投資商機，進一步發展其業務。股價對呢個消息反應有限，反而係之前集團曾以每股0.42元配股集資，以現價0.44元計算，接咗貨班投資者，現價計只錄得微利，呢個先係威靈遲吓或炒上的誘因。大股東美的配股後，仍持有六成以上股權，可見之前係股權過度集中，街貨流通量唔夠，交投唔活躍，令威靈股價一直落後同業。去年業績成功扭虧，料在「家電下鄉」政策扶持下，威靈今年業績可更勝去年，前景睇高一線，配股的調整完成，現價上車目標0.5元，止蝕位以0.42元配股價作參考。
詩詩