孖妹缸湖遊：張華峰︰魚缸「升呢」有得做

提到張老闆嘅威水史，佢喺九七年成為香港聯合交易所理事，○○年更以高票當選特區政府選舉委員會金融服務界委員，同年仲獲委任為太平紳士，○三年成為全國政協委員。咁多要職在身，孖妹相信佢一定有好多金融古仔可以講畀大家知，投資心得亦應該唔少。

張：恒豐證券董事總經理張華峰

提升專業服務增戰鬥力

高妹：知道你剛啱卸任香港證券學會會長，做咗金融呢一行幾十年，你覺得證券行仲有冇得做落去呢？

張：其實我做咗呢行40年，我19歲入行，頭10年喺證券行打工，喺八○年就開咗恒豐證券。以前恒指每日嘅成交量好少，真係識炒股嘅人亦唔多，但今時今日散戶接觸股票資訊渠道多咗，炒股或者炒衍生工具嘅人數亦大增，所以只要本地證券行肯繼續創新、自我增值以及提高服務水準，就一定仲有得做。

莉莉：但有啲人話證券行係夕陽工業，當年經紀可以日日「魚翅撈飯」嘅日子已經不再喎！

張：有時銀行推出買賣股票「零佣金」，我哋嘅競爭壓力真係好大，科技發展日新月異，股票買賣推行網上化交易，對經紀收入一定有影響。不過銀行係大機構，產品及服務比較多，唔夠證券行嘅業務咁集中，而且有唔少人都會倚賴經紀嘅專業分析去買賣股票，所以除咗證券行要積極改善服務水準，經紀亦要不斷進修，增強競爭能力。

成功之道 挑戰新事物

高妹：雖然本地證券行仲有生存空間，但當中最大限制或者要面對嘅難關又喺邊度呢？

張：現時政府希望將香港打造成為國際超級金融中心，對企業形象亦要求國際化，可惜喺呢個目標之下，暫時未見有政策係協助本地證券行進身此列。另外，自從金融市場更加開放後，不斷有新競爭者加入，行業競爭愈嚟愈大，我好希望政府可以推出更多措施幫助我哋，千祈唔好排斥本地證券行嘅未來發展。

莉莉：你除咗係證券界嘅表表者，你仲有咁多公職，究竟你有乜嘢成功之道？

張：20歲嗰年，我喺太平山頂望落香港街道，見到有好多高樓大廈，心諗自己嘅工作能力又唔係差過人哋，點解連一間屬於自己嘅屋都冇？於是我就同自己講，一定要努力工作，搵多啲錢。至於成功之道，咪就係不斷挑戰新事物囉！

回首敗績 仙股變牆紙

高妹：經過幾十年嘅努力，你終於擁有自己嘅樓啦，而且仲要住喺山頂，真係羨慕死我哋。

莉莉：係囉，聽講你仲喺南京買咗塊地，地價都應該升咗唔少啦！

張：喺九五年我有機會去南京投資，後來因為要興建廠房，所以先至買咗一塊約500畂嘅地皮，當時地價係20萬元人民幣一畂，依家塊地皮都升價咗10倍喇。

高妹：嘩！10年之間就升咗10倍，遲啲人民幣升埋值，你咪賺得仲多？張老闆果然有投資眼光。

張：我買股票都試過輸錢㗎，不過多數都係輸喺仙股手上，好多股票停牌之後就冇再復牌，搞到啲股票無端端就變咗做牆紙。

當年獲批股 最愛388

高妹：股場如戰場，當中一定有贏有輸，唔知你嘅愛股又係邊隻呢？

張：哈哈！我嘅愛股應該係港交所（00388）。當年政府將聯交所、期交所及中央結算合併並且股份化，為咗實行呢件事，證券行被獲批一啲港交所股份，當時我擁有7個經紀牌照，最後批咗幾百萬股畀我。

莉莉：○○年港交所嘅上市價係3.88元，之後高位仲見過二百幾蚊。嘩！港交所上周五收市報131.6元，佢實際賺咗幾多？呢條數股友們真係可以計吓。

22%人指「9招12式」衝擊樓價

可能因為有太多「80後」呻冇錢買樓，加上頻頻出現示範單位唔夠「真實」嘅說法，搞到政府終於忍唔住出手，為咗壓抑樓市過熱，於是推出「9招12式」，唔知大家認為呢啲措施對本港樓價衝擊大嗎？據今期《東方產經》網上民意調查，截至上周末晚上6時，話覺得「衝擊大」嘅有22%，有47%人話「衝擊不大」，而認為「沒有影響」則有31%。

高妹、莉莉

若有料報畀高妹同莉莉或有嘢問，可電郵money.biz@opg.com.hk