市場熱線：澳優質素取勝

希臘終向IMF「嗌救命」，令其債務危機得以紓緩，歐洲魚缸亦做好。歐美魚缸做好，帶動本地魚缸在花旗掛牌的ADR反彈，除三兄弟檔口（00016）股價再跌，其他ADR普遍錄得0.6%至1.7%升幅，升幅最大為受惠油價向上的中海油（00883）及中石油（00857）。花旗聯儲局將於本周三議息，古勝預期聯儲局唔會咁快搵「息魔」出手，不過會後發表的聲明，將對未來經濟前景及息口走勢有所啟示。至於周五花旗將公布GDP，亦會係市場焦點。

本地魚缸跌極有限

本地魚缸上周表現疲弱，繼北大人重藥重打紅色地主，香江官府亦推「9招12式」指引「招呼」本地地主，本地魚缸上周失守重要支持位，若然恒指在呢一兩日無法重返21,500水平企穩，預期仍要向下試二萬一的大位，最壞情況更有機會回試三月低位20,576點。

不過話分兩頭，本地魚缸的估值唔算高，今年預測巿盈率只有13倍，二萬一樓下有龐大支持，加上市場仍憧憬人仔升值，本地魚缸跌極有個譜。況且上星期本地魚缸炒股唔炒市，個別板塊續有追捧，看官唔見得無啖好食。莊家一向「精甩尾」，若然本地魚缸玩完，佢哋率先散水，仲點會有股落鑊？暫時古勝見唔到咁壞情況，相信呢段時間本地魚缸只係整固，只要守住二萬一，後市仍睇高一線。

毛利率具上升空間

趁魚缸調整買質優股，古勝今日推介澳優乳業（01717）。集團較早前派成績表，○九年淨利潤同比增長158%至1.82億人仔，跟登陸魚缸時招股書預期相若。澳優的產品分為3個系列，分別為A選系列、優選系列和能力多系列，後兩者屬較高檔次產品。去年3個系列分別增長1.6%、46.3%和85.2%，佔總營業額9.7%、40.8%和47.8%，產品組合檔次提高，帶動毛利率擴闊，由36%升至49%，料擴闊趨勢仍會持續，中線或可達60%以上。

雖然澳優的市佔率只有2.8%，但澳優應屬往上走而非被淘汰企業，增長絕對有保證。隨着人均收入不斷提高，祖國目前正處於建國以來第4次嬰兒潮，奶粉市場的增長潛力難以估計。面對龐大的商機，澳優有其競爭優勢，集團的奶粉雖在湖南生產，但奶源產地為澳洲乳品企業，而且已在澳洲註冊，屬高端外國品牌。自祖國發生三聚氰胺的毒奶事件後，高檔和極高檔奶粉的市佔率持續提高，帶動澳優盈利保持高速增長。澳優今年的盈利仍有機會翻一番至3.6億元，每股盈利達0.39元，以合理市盈率18倍計算，其股價可見7元。

古勝