絲絲講場：中電郵袋寄年報確環保
潮流興環保，上市公司每年要寄發年報、通函及股息等，耗用唔少紙張，所以唔少公司都諗計以減少呢啲耗用地球資源嘅嘢。絲絲聽中電（00002）嘅公司秘書陳姚慧兒講，佢哋去年已率先使用可再用郵袋投寄年報，旨為透過企業日常營運為環保作出貢獻。
喺過去六年以來，中電嘅兩萬名股東中，選擇以電子方式閱讀年報嘅股東已由百分之二增至百分之十八。
倡電子交易收股息
中電今年承諾為每位選擇以電子方式收取《年報》及《可持續發展報告》嘅登記股東，向自閉症人士福利促進會捐出港幣六十元，公司同時鼓勵股東選擇以電子交易方式收取股息，現時近百分之六十中電股東選用這方式收取股息。
中電去年嘅年報已經開始用環保包裝設計，今年佢哋為《2009年報》及《可持續發展報告》增添新特色，包括進一步改善環保的包裝設計，以及採用多項新編排令閱讀更方便。
陳太話，中電用以投寄上述兩本刊物嘅新郵袋採用軟身布料設計，打開可作為大型購物袋使用，亦可摺細方便隨身攜帶。
佢話中電推出咗兩個《可持續發展報告》版本，包括可於公司網站下載嘅互動網上版，以及與《年報》一併寄發嘅精要印刷本，網上版採用咗全新編排，以電子書模式設計，方便股東閱讀。
余絲韻