打工仔最怕公司肥上瘦下，恒大地產（03333）尋日出年報，主席許家印堂堂中國首富，去年董事袍金只係4萬蚊人仔，薪金及退休金計劃供款呢兩欄都係零。佢嘅下屬亦即係公司兩位副主席夏海鈞及李鋼，年薪分別有成1,369萬及1,180萬人仔；「掌櫃」謝惠華年薪都有446萬人仔。恒大「肥下瘦上」，絕對係打工仔眼中嘅好公司。
不過絲絲又覺得，許家印畀得自己4萬蚊年薪，都真係刻薄咗少少，話晒佢為公司勞心勞力，出晒名係工作狂，竟然係成個董事局最低薪嗰個；其實許生對自己好少少，相信小股東都唔會嘮嘈。
不過，恒大一上市就派息，末期息有成0.7分人民幣，以許生嘅持股量，佢都收成七千幾萬蚊股息。
余絲韻