絲絲講場：滙豐招募Y世代大使
時下興講「80後」現象，事實上，「80後」力量真係不容忽視。滙豐銀行就特登招募20位「Y世代大使」，希望透過佢哋可以更加了解年輕新一代嘅理財需求，設計更合適嘅服務。
「80後」成未來增長動力
所謂Y世代係指喺八○至九五年間出世，年齡介乎15至30歲嘅年輕人。滙豐香港區個人理財業務主管麥倩華話，佢哋喺香港有420萬名客戶，當中有80萬人係屬於Y世代，市場滲透率達50%；佢哋相信喺未來10年，Y世代將成為香港勞動人口嘅主流，預計Y世代客戶會係滙豐未來盈利增長動力，所以該行致力要成為佢哋嘅首選銀行，以保持市場領導地位。
麥倩華又透露，Y世代都會學吓投資，有兩成人會買吓旅遊、醫療保險及月供基金，另外亦有一成嘅Y世代客戶擁有證券買賣戶口。
招攬大學生 最多聘20人
講番今次呢個計劃，滙豐將會聘請最多20位大學生或剛啱畢業嘅大學生擔任「Y世代大使」，進行3至6個月嘅嘅實習工作，希望可以喺暑假展開，最初3個月係全職，之後嘅3個月就可以係兼職形式。絲絲都好認同滙豐重視Y世代客戶嘅策略，平時絲絲行街Shopping，發現好多購買力都係嚟自呢班後生仔，佢哋有消費力之餘亦會用到銀行服務。
要躋身「Y世代大使」行列，麥倩華話首先要有良好嘅溝通技巧，雖然唔一定要商科出身，但就要對商業有興趣，最好就係大學學生組織嘅領導啦。有興趣嘅大學生今日起可透過滙豐網頁遞交申請。
余絲韻